الست أم عبده تعمل ايه بعشرة الاف جنيه؟؟؟؟؟؟؟؟؟

دى قصة الست أم عبده ... شوفوا عايزه تقول ايه؟

السلام عليكم و رحمه الله و بركاته :-
عايزه كل اعضاء المنتدى يشاركوا بأرائهم و افكارهم
و يكونوا سبب فى مساعدتى
انا سيدة لدي اطفال و معايا 10000 عشرة الاف جنيه
عايزه أعمل مشروع ؟؟؟؟؟؟؟؟؟
سألت ناس تجار و وأولاد سوق ومتعلمين... ردو عليا بالردود الاتية:

1- انا عندى فكره قد تكون غريبة و لكن سهل تنفيذها لو اى حد من اللى تعرفيهم يكون بيشتغل فى شركة كبيرة عدد موظفينها يكون مثلا فوق 100 موظف فإنت ممكن تعملى مشروع اعداد افطار للموظفين و تسليمه لهم كل يوم صباحا حسب طلباتهم لان اظن ان معظم الناس بتقابل مشكلة الفطار يوميا فلو اللى انتى تعرفيه ده وفر لك فرصة دخول احدى الشركات و اتعاقدت على توفير الفطار حسب طلباتهم ممكن تشتغلى و تعدى السندوتشات و تسلمها لهم صباحا و بكده راسمالك هيكون يكفى و برضه تكونى قاعدة بتشتغلى من المنزل لرعاية اسرتك و أطفالك و الله المستعان و ربنا يوفق.

2- هناك مشروع يناسبك وهو التفصيل
ويحتاج المشروع الى ماكينة خياطة انتاج ( سريعة ) من نوع جيد
ومتوسط السعر جديدة 3000 - 4000جنيه . وممكن تكون مستعملة بسعر اقل
وماكينة اوفر متوسط 1500 جنيه
وتوفر فى مسكنك حجرة للعمل
اذا كنتى تجيدى التفصيل فهذا جيد ولا توجد مشكلة
اذا كنتى لا تجيدى التفصيل ، فلابد من تعليم التفصيل فى مراكز متخصصة
وهناك مراكز لتعليم التفصيل بمبالغ رمزية وتدريب على الماكينات والتفصيل والباترون ... الخ.

3- حسب نوع العمل الى تجيديه ....... إنتى بتعرفى تعملى ايه ؟؟ .......... وإنتى ساكنة فين قرية ولامدينة ... والاهم من ده كله ماتدخليش فى اى حاجة قبل التاكد من كافة الضمانات ان المبلغ مش هيضيع لان كل الفرص بتبان حلوة فى الاول .

4- مشروع يعني مخاطره و لا اعتقد انك تستطيعى تحمل المخاطره ممكن اعرف مؤهلاتك؟ لو معاك مؤهل يبقي تدور علي سفر لدوله عربيه لو معكيش فمصر اقتصادها واقع و مفيش مشروع بينجح فيها لكن لو تقدرى تتحملى خساره المبلغ ولا تتاثر حياتك بتاتا ممكن تفتحى محل فول وطعميه - محل ايجار في مكان شعبي بايجار بسيط و تجهيز بسيط للمحل وتبيعى الاكل باسعار بسيطه الموضوع ممكن يكلف قليل لكنه برده مخاطره.

5- اقترح على حضرتك انك تستخيرى الله و تدعى فى ساعات الاجابة انه يوفقك للاختيار السليم و الانسب و تكثرى الاستغفار معلش لا اقدر اقترح غير ذلك فلا تزعلى منى.

6- للاسف إن الحقيقة أى مشروع فى مصر مهما بدا جيدا بدون نفوذ وأموال كبيرة لازم يخسر وأقترح إنك تحطيهم فى سهم ثابت زى عز الدخيلة كوبونه 60 او 65 كل ربع سنة غير ان سعره الان جيد ويمكن تحديد طريقة الدخول بسؤال أهل العلم الثقة مثل المهندس عبد العزيز أو الاستاذ طارق جعفر وأنا متأكد إنه مش حيدلك الا على الخير مثل توقيت الدخول والسعر المناسب .......أو ممكن وثائق إستثمار بنك فيصل الاسلامى مثلا . والاقتراح الاول ان شاء الله دخله بيكون أفضل من المشروع .

7- لو معاكى مؤهل فى المحاسبة يمكنك الالتحاق بأحد مكاتب المحاسبة والمراجعة الذى لايشترط التفرغ ولكن يتم تكليفك بمهام محددة غير مرتبطة بالوقت ..... فإذا أمتلكتى الخبرة المناسبة بعد فترة سوف تجدى ان شاء الله بسهولة الوظيفة المناسبة التى تناسب ظروفك بشروطك وخبرتك .

8- ممكن معمل جبنة او زبادى وده سهل ومش مكلف وكل التعب انك حتتفقى مع كام بقاله شغالة كويس بمساعدة الجيران او المعارف وخلاص وده حيعملك دخل يومى كويس انشاء الله.

9- افضل مشروع بهذا المبلغ هو المتاجرة بالتقسيط و خصوصا في تجهيز العرائس
يعني شوية حاجات مثلا كالبياضات او الملابس الداخلية او العبايات او اجهزة بسيطة او ادوات مطبخ تنزل مكاتب العتبة و تشتري منهم و الافضل لك في البداية انك تشتري حسب طلب الزبائن بمعني تجمعى طلبات من الزبائن و بداية هيكونوا الجيران و المعارف و تاخدى من كل واحدة منهم 25% مقدم او حسب امكانيات كل زبونة و المكسب هيتراوح بين 30% او 40%
و في البداية عليك ان تردى كل ما تحصلى عليه في راس المال يعني تشتري تاني بيه و ما تاخديش حاجة من المشروع لمدة سنة مثلا و لك ان تتخيلي مقدار دورة راس المال
المشروع ده انا اعرف ناس كتيره عاملاه و ربنا وفقهم جدا لدرجة اني اعرف صديق عزيز جدا نزل من السعودية و بدا المشروع ده و هو في قرية من قري الصعيد و بدا بالاجهزة الكهربائية و المبلغ اللي بدا به كان في حدود 50 الف جنيه و ربنا كرمه اخر كرم .الميزه في المشروع ده انك مش محتاجة مكان او محل تشتغلى فيه
لانك ببساطة هتشتغلى و إنتى قاعدة في بيتك يعني عندك الوقت تتابعى بيتك و اولادك.

10- يا ستى فى حاجات كتيره .. بس للى يشغل دماغه منها مثلا:
- ممكن غرفة في شقتك تستضيفى فيها اطفال في سن الحضانة من شهر الي 5 سنوات للموظفات ..حضانة خاصة بس على صغير و الحضانه بتخلص بكتيره الساعه 3 ولو كسبت تجيبى بنتين يقفوا مكانك.
- ممكن تعطي دروس للاطفال وبنات دبلومات تجارة في بيتك.
- ممكن لو عندك تليفون تعملى دعاية لنفسك بطبخ اكلات للموظفات مقابل مادي.
- ممكن تفتحى محل تصوير وتتعلمى التصوير والتحميض .
- ممكن تبحث عن شركات تبحث عن مندوبات عن طريق التليفون اي تقوم بالبيع عن طريق التليفون واخذ عمولتها.
- ممكن لو عندك شقة انك تستغني عن غرفة فيها وتؤجريها مفروشة للطالبات المغتربات .
- او تشتري شهادات البنك الاهلي التجاري البلاتينية واعتقد بتجيب 12 % سنويا وتسدد لك ربع سنوي .

11- خدى يا ستى الموقع ده متميز للمشروعات متناهية الصغر
[ندعوك للتسجيل في المنتدى أو التعريف بنفسك لمعاينة هذا الرابط]

و مبدئيا يفضل لك مشروع به تجارة (مثل توريد الادوات المكتبية و ورق التصوير للهيئات او المدارس او الشركات الكبرى)
ثم المشروعات الزراعية الفردية(عيش الغراب مثلا)
و نصيحة لك تقليل العمالة لاقصى حد (يفضل العمل المنفرد في البداية)و البعد عن مشاركة اي شخص
و ربنا يوفقك ويباركلك.

يارب نكون أقدرنا نساعد كل انسان أو انسانه عايزين يكسبوا بالحلال
و اى حد عنده اى فكرة يعرضها و نكون افكار مختلفة يختار منها كل شخص ما يناسبه

ايه الابداع ده يا ديجيتال ..... وصلت رسالتك
وربنا يخلى ام عبده ... عشان تطلع الحاجات الحلوة دى

» تعمل ايه لو قابلت الرخم ده فى الشارع ؟؟؟
» اسطوانة موسوعة ويكيبيديا تعمل بدون انترنت